Klám-hvað er svona slæmt við það?

Klám er stöðugt að verða meira áberandi í samfélaginu okkar, og með internetinu er líka mun auðveldara að nálgast það. Margir skoða klám sér til ánægju og örvunar, og ætla ég svo sem ekkert að vera að dæma það.

Hins vegar er mjög mikilvægt að muna að klám er alls ekki góð heimild um hvernig kynlíf á að vera í raun og veru. Klám getur reyndar gefið mjög brenglaða mynd af kynlífi og því mikilvægt að taka því með fyrirvara.

Til hvers er klám?
Klám og erótískt efni hugsað til að örva fólk kynferðislega. Einhverjir nota það sem eins konar hjálpartæki við sjálfsfróun, og aðrir horfa á klám með maka sínum til að krydda upp á kynlífið.

Það er í sjálfu sér ekkert rangt við að horfa á klám og óþarfi að skammast sín fyrir það. Hins vegar þarf að horfa á klám með gagnrýnum augum og alls ekki gera ráð fyrir að kynlíf í raunveruleikanum sé eitthvað líkt því sem maður sér í klámmyndum. Það er í raun álíka fjarstæðukennt að halda að klám sýni raunhæfa mynd af kynlífi eins og að telja að sjónvarpsþátturinn Nip/Tuck gefi raunsanna mynd af lífi og starfi meðal lýtalækna, eða House gefi góða mynd af starfi lækna. Klám fellur að sömu lögmálum og kvikmyndir og sjónvarpsþættir að því leyti að mest er hugsað um hvað lítur vel út á filmu og hvað selst, en lítil áhersla lögð á að endurspegla heiminn eins og hann er í raun og veru.

Dæmi um röng skilaboð í klámi:
-Risatyppi og melónubrjóst
Margir klámmyndaleikarar eru karlmenn sem eru gífurlega vel vaxnir niður á við eða konur með sílíkonbrjóst uppá herðar. Það er nauðsynlegt að vera meðvitaður um að þetta fólk er ekki raunhæfar fyrirmyndir fyrir okkur almúgann. Það er því algjör óþarfi að vera með minnimáttarkennd þó limurinn sé ekki eins og á hrossi eða brjóstin séu svo stór að hægt sé að nota þau í stað eldhúsborðs.
-Konur fá fullnægingu samstundis og án mikillar fyrirhafnar.
Í klámmyndum virðast konurnar oft byrjaðar að stynja nánast áður en bólfélaginn hefur komið við þær. Einnig fá þær fullnægingu við furðulegustu aðgerðir, til dæmis við það að bólfélaginn slái oft og ört með flötum lófa á snípinn á þeim. Raunin er hins vegar sú að fæstar konur myndu fá nokkuð útúr slíkri meðferð og allar líkur á að þær meiði sig frekar en að þær njóti þess.
-Ýmis konar óhefðbundið kynlíf sýnt sem sjálfsagður hlutur.
Í klámmyndum er mjög algengt að sjá threesome eða hópkynlíf, endaþarmsmök, S&M og fleira sýnt sem sjálfsagðan hlut. Staðreyndin er hins vegar sú að aðeins takmarkaður hópur nýtur slíks kynlíf. Vissulega eru þeir til sem vita ekkert betra en endaþarmsmök, njóta þess að stunda kynlíf með maka sínum og 5 til viðbótar eða vilja helst af öllu vera bundnir og barðir í kynlífinu. Þarna er hins vegar um að ræða lítinn hóp. Áður en kynlíf af þessu tagi er stundað er vissara að næla sér í reynslu í hefðbundnu kynlífi, kynnast sjálfum sér og sínum löngunum vel og gæta þess vandlega að sá sem maður stundar kynlíf hafi einnig löngun til að reyna þessa hluti. Það er alls ekki gott ef strákur hefur til dæmis horft á klámklippu á netinu og heimtar svo endaþarmsmök með kærustunni eins og hann sá í myndinni, eins og það sé sjálfsagður hlutur. Hins vegar er sjálfsagt að prófa sig áfram hafi báðar aðilar áhuga á því, svo lengi sem það er gert á yfirvegaðan hátt, og með heiðarleika og traust í fyrirrúmi
endaþarmsmök normal
-Harkalegt kynlíf og nauðganir gerðar eðlilegar og jafnvel upphafðar
Því miður hefur skapast töluvert öflugur iðnaður í kringum svokallað hardcore klám, en það er gjarnan gróft, sýnir oft karlmanninn í mikilli valdastöðu og er gjarnan niðurlægjandi fyrir konuna. Karlmaðurinn rífur í hár konunnar og slær hana, og í sumum tilvikum er beinlínis verið að líkja eftir nauðgun. Nauðgun og ofbeldi er að sjálfsögðu ekkert gamanmál og alls ekki sexí. Það er mjög varhugavert að fara að líta á hártoganir, flengingar, barsmíðar og niðurlægjandi orð sem sjálfsagðan part af kynlífi. Kynlíf ætti alltaf að byggjast á trausti og virðingu milli þeirra sem þess njóta saman, og á fyrst og fremst að einkennast af væntumþykju og vellíðan.

Það er alltaf mikilvægt að horfa á kvikmyndir og sjónvarp með gagnrýnum augum og trúa ekki öllu eins og nýju neti. Klámmyndir eru þar engin undantekning. Ef þú vilt fá upplýsingar um raunverulegt kynlíf mæli ég eindregið með því að þú leitir annað en á klámsíður internetsins. Til dæmis væri góð hugmynd að senda spurningar á spurduragsy@gmail.com

kveðja
Ragnhildur

Sannleikurinn um megrunar- og brennslutöflur

Við lifum á tímum mikilla öfga, og er holdafar engin undantekning. Þeir feitu eru stöðugt að verða feitari og þeir mjóu mjórri. Stöðugt er hamrað á því í fjölmiðlum og almennt í samfélaginu að við þurfum stöðugt að vera í megrun og vinna að því að verða grennri og meira fit. Þar sem fyrirmyndirnar sem við höfum fyrir augunum eru oft óraunhæfar eru margir sem nýta sér ýmsar brennslu- og megrunarpillur í baráttunni fyrir hinum fullkomna líkama. En eru þessar töflur öruggar?

Megrunarlyf eru oftast gerð til þess að nota með góðri hreyfingu og hollu fæði. Almennt er lyfjameðferðum við offitu fyrst beitt ef megrun hefur ekki náð tilsettum árangri og BMI (body mass index) viðkomandi er hærri en 30, en ef einhverjir áhættusjúkdómar eru til staðar, eins og sykursýki, hjartasjúkdómar eða háþrýstingur, er stundum skoðuð meðferð við BMI 27. Lyf eru því ekki ætluð fyrir fólk í eða rétt yfir kjörþyngd. Kjörþyngd er BMI 20-24.9, og er hægt að reikna út sinn BMI stuðul til dæmis hér

Megrunar- og brennslulyf hafa, eins og önnur lyf, ýmsar aukaverkanir. Þær algengustu eru svefntruflanir, ógleði og meltingarvandamál, streita, kvíði og skjálfti, og getur þetta valdið miklum óþægindum. Einnig getur fylgt hækkaður blóðþrýstingur og og hár púls.

Green tea töflur eru vinsælar til grenningar og heilsubótar. Það er satt að grænt te er í hófi sagt bæta heilsu og hafa margvísleg góð áhrif. Hins vegar sýna rannsóknir að í miklu magni getur grænt te verið beinlínis skaðlegt heilsunni og meðal annars valdið lifrar- og nýrnaskemmdum. Þegar teknar eru þessar green tea töflur er gífurlegar mikil hætta á þessu þar sem í þeim er svo mikið magn af virka efninu, og hafa því miður margir brennt sig á þessu og fengið lifrarbólgu á unga aldri í kjölfar notkunar á green tea töflum.

Hydroxycut er annað vinsælt brennsluefni, mikið auglýst með fögrum loforðum um færri kíló og aukið hreysti. Hins vegar segja sérfræðingar að fátt bendi til þess að þær virki á þann hátt sem framleiðendur lýsa, og að þær rannsóknir sem framleiðendurnir birta á heimasíðu lyfsins til að sýna fram á virkni þess séu gallaðar. Auk þess geta töflurnar beinlínis verið skaðlegar. Algengar aukaverkanir af töflunum eru skapstyggð, óróleiki og eirðarleysi og svefntruflanir. Aðal virku efnin í hydroxycut eru Ma Huang, sem er jurtaform efedríns, Guarana Extract sem er koffín, og White Willow Bark, sem er í rauninni bara aspirín eða blóðþynnandi. Rannsóknir hafa sýnt að þegar þessi virku efni eru notuð saman getur það valdið skaða á hjarta- og æðakerfinu, til dæmis skemmda á hjartalokunum, slagæðaskemmdum og háþrýstingi og einnig geta komið fram taugaskemmdir.

Lokaniðurstaðan er því sú að megrunar- og brennslutöflur virðast ekki virka eins og framleiðendur lofa, að minnsta kosti af rannsóknum að dæma, og geta verið mjög skaðlegar heilsunni. Telji maður sig þurfa að léttast er mun betra að gera það með því að auka hreyfinguna og borða hollari fæðu. Best er að grennast hægt og rólega því þá eru minni líkur á að allt bætist aftur á mann.

En auðvitað er bara langbest að hugsa ekki um að grennast heldur bara að líða vel og vera sáttur í eigin skinni!

Ef þú hefur spurningar varðandi megrun, megrunartöflur eða hvað sem er annað, endilega sendu mér póst á spurduragsy@gmail.com!

kveðja
Ragsy

Heimildir: Stuðst upplýsingar af mbl.is, doktor.is, eulyf.is, newscientist.com, epinions.com, cbc.ca, medicalnewstoday.com og greinina The Ups and Downs of Diet Pills eftir Erin Donnelly, birt á vefnum body-philosophy.com

Áfengi-er það málið?

Það hafa nú sjálfsagt allir heyrt mikið og margt um skaðsemi áfengis, en ég ætla nú samt sem áður að rifja þetta aðeins upp hérna
-Áfengi skerðir dómgreindina...veldur því að maður getur gert mjög heimskulega hluti eða hluti sem maður sér eftir síðar
-Áfengi hefur mjög slæm áhrif á ýmis líffæri, til dæmis lifrina og hjarta-og æðakerfið
-Áfengi getur dregið úr testósterón framleiðslu og valdið getuleysi hjá karlmönnum (að ógleymdu tímabundnu getuleysi sem nánast alltaf fylgir mikilli ölvun)
-Áfengi eykur tíðni afbrota, sjálfsvíga og slysa
-Áfengi veldur þynnku og djammviskubiti daginn eftir

auk þess er náttúrulega ólöglegt að neyta áfengis fyrir 20 ára aldur...

Þrátt fyrir þetta allt saman eru, eins og við vitum, fjölmargir sem kjósa að drekka áfengi. Ef þú ert ein(n) af þeim þá eru hér nokkur góð ráð:

-Drekktu ekki of mikið í hvert sinn og ekki á tóman maga-yfirleitt skemmtilegra þegar maður amk man eftir kvöldinu
-Vertu ófeimin(n) við að segja hvenær sem er 'nei takk' við áfengi
-Taktu „áfengisfrí“ – Prófaðu að sleppa áfengi alfarið um einhvern tíma -ef maður getur það ekki þá gæti verið um vandamál að ræða...
-Drekktu áfengi að hámarki eitt kvöld um helgar
-Ekki þrýsta á aðra í kringum þig að neyta áfengis, allir hafa rétt á að ákveða það sjálfir
-Ekki nota áfengi þegar þér líður illa, -áfengi leysir engan vanda, en getur hins vegar skapað ný vandamál!

Gott er að hafa í huga að:
-því sterkari sem drykkur er, því minna þarf maður af honum til að verða ölvaður og missir því fyrr stjórnina
-því hraðar sem maður drekkur því hraðar finnur maður fyrir áhrifunum og missir því fyrr stjórnina
-áhrif áfengis verða mun meiri og verri, frekar uppköst og vanlíðan, ef drukkið er á fastandi maga
-áfengi hefur meiri áhrif á stelpur en stráka, stelpur þola að meðaltali um 30% minni vínanda en strákar. Einnig þolir fólk minna þeim mun minna og/eða léttara sem það er.

Áfengi er sem sagt óhollt og heilsuspillandi, getur látið mann verða sér til skammar, setur mann í hættu varðandi afbrot, árásir og slys og svo er það líka rándýrt! Ef maður ætlar samt sem áður að neyta áfengis er eins gott að gera það á ábyrgan hátt og vera tilbúinn til að taka afleiðingunum, hverjar sem þær nú eru.

Ef þið hafið einhverjar spurningar um þetta (eða eitthvað annað), endilega sendið tölvupóst á spurduragsy@gmail.com

Góða skemmtun, með eða án áfengis,
kveðja

Ragnhildur

Heimildir: Stuðst við bæklinginn 'Hvað veist þú um áfengi' frá Lýðheilsustöð og fræðslu á vefsíðu Lýðheilsustöðvar og doktor.is

Mataræði!

Matur er frábær! Það er roooosalega gott að borða góðan mat, og flestir eru nú þannig að varla geta komið saman fleiri en tveir einstaklingar án þess að boðið sé uppá eitthvað að narta....
En matur er auðvitað líka mjög mikilvægur, veitir orku og nauðsynleg næringarefni og heldur okkur ferskum í því sem við þurfum að gera

En hvað á að borða?
Það er svolítið orðið þannig að maður getur varla opnað blað eða kveikt á sjónvarpinu án þess að heyra umræðu um að maður eigi ekki að borða þetta eða hitt, megrun þetta og hydroxycut hitt...með allar þessar misvísandi rugl-upplýsingar er ekki furða þó maður viti bara ekkert hvað maður má láta ofan í sig lengur!

Málið er hins vegar furðu einfalt: Borða fjölbreytt, borða bara venjulegan mat og nóg af honum! En svona til frekari leiðbeiningar koma hér nokkrir punktar um mataræði:

-Mikilvægast er að hafa fæðuna sem fjölbreyttasta. Engin ein fæðutegund veitir öll næringarefnin sem við þurfum, hvort sem það er skyr, ávextir eða pizza. Nauðsynlegt er að borða eitthvað af öllu, grænmeti, ávexti, kjöt, fisk, korn og jafnvel fitu!

-Borða grænmeti og ávexti daglega. Þið hafið heyrt þetta, 5 á dag! Það hljómar kannski mikið, en er í rauninni ekkert mál, bara hreinn ávaxtasafi með morgun- og hádegismatnum, láta salat fylgja hádegis- og kvöldmatnum og fá sér eitt epli eða banana um miðjan daginn...voilá, 5 stykki komin! Ekkert mál að finna sér grænmeti og ávexti sem maður fílar, mitt uppáhald er rauð paprika, gúrka, epli, bananar og ber...

-Borða fisk! Tvisvar í viku! Hljómar það ekki nógu spennandi? Það er samt enginn vandi að finna sér fiskrétti við sitt hæfi. Fiskbúðin Fiskisaga er til dæmis með rosa mikið úrval af alls konar fiskréttum, ekki bara gamla góða soðna ýsan og plokkarinn. Einnig má borða reyktan lax, silung eða síld ofan á brauð, mjög gott!
Og ef þið bara engan veginn meikið fisk, fáið ykkur þá að minnsta kosti lýsi eða lýsisperlur, omega-3 fitusýrurnar eru víst alveg lykilinn að góðu lífi!

-Fá sinn skerf af trefjum, til dæmis úr trefjaríku morgunkorni, grófu brauði, brúnum hrígsgrjónum og heilhveitipasta. Þeir sem ekki borða trefjar fá harðlífi og það vill nú enginn :s

-Tvö mjólkurglös á dag, eða tvö jógúrt, skyr, ost eða whatever...bara fá kalkið sitt daglega! Þetta er sérstaklega mikilvægt fyrir stelpurnar, annars lendum við bara í beinþynningu beint eftir menntó, frekar glatað! Ef venjuleg mjólk fer illa í ykkur þá bara svissiði yfir í sojamjólk!

-Passa að fá líka fitu, en þá frekar mjúka fitu en harða. Til dæmis nota ólífuolíu á mat og olivio eða eitthvað þannig jurtasmjör frekar en smjör. En alls ekki kötta fituna út, maður verður að fá sinn skammt af svoleiðis eins og öðru!

-Hreyfa sig í klukkutíma daglega! Þarf ekki að vera flókið, bara kortersrölt í og úr skólanum, sund með félögunum í hálftíma um eftirmiðdaginn eða trylltur dans um kvöldið...klukkutíminn er kominn! Ekkert mál!

-Nammi nammi...má það? Örvæntið ekki, því ef maður borðar góðan, hollan og fjölbreyttan mat og hreyfir sig reglulega má maður alveg leyfa sér nammi og/snakk í hófi. Sumum hentar best að hafa bara einn nammidag í viku, öðrum finnst betra að fá sér bara nammi þegar þeir eru í þannig stuði, hver og einn verður bara að finna sér hvað er best. Mín aðferð er að borða alltaf einn ávöxt, epli eða banana, áður en ég fæ mér nammi, þá finnst mér ég ekki þurfa að borða jafn mikið nammi og minni líkur eru á að ég borði á mig nammigat!


Vonandi hjálpar þetta! Ef þið hafið einhverjar spurningar um mataræði eða bara hvað sem ykkur dettur í hug, endilega sendið tölvupóst á spurduragsy@gmail.com
Kveðja,
Ragsy!

Heimildir: Stuðst við bæklinginn 'Ráðleggingar um mataræði og næringarefni' frá Lýðheilsustöð, gefinn út árið 2006

Ný síða!

Sæl öll sömul!

Þetta eru þá fyrstu skrifin á þessari síðu, sem á vonandi eftir að nýtast sem flestum. Hér mun ég birta ýmsan fróðleik um kynlíf, sjálfsmynd, heilbrigði og heilsufar, sambandsráð og allt milli himins og jarðar. Ef þið eruð með spurningu eða vantar ráðgjöf endilega ekki hika við að senda tölvupóst á spurduragsy@gmail.com
Ég mun leggja mig fram um að svara tölvupóstum innan þriggja daga frá því að þeir berast. Fullum trúnaði er að sjálfsögðu heitið. Ég mun aldrei birta fyrirspurnirnar hér á síðunni nema hafa fengið til þess leyfi hjá þeim sem sendi, og að sjálfsögðu er þetta allt saman nafnlaust.
Ef einhver fyrirspurn berst sem ég veit ekki svarið við mun ég leggja mig alla fram um að leita svara annars staðar. Einnig get ég ráðlagt hvar þið getið sjálf fundið upplýsingar um ýmis málefni.

Svo að bara....byrjið að spyrja!!

kveðja
Ragsy